Friday, August 28, 2009

ഒരു ഐ.ടി. ഓണസദ്യ


[ഇന്നലെ ഉച്ചക്ക് ഓഫീസിലെ ഓണാഘോഷത്തിന്റെ ഭാഗമായി, ടെക്നോപാര്‍ക്കിനടുത്തുള്ള പ്രശസ്തമായ ഹോട്ടലുകാര്‍ തയ്യാറാക്കിയ ഓണ സദ്യ കഴിക്കുവാന്‍ ഭാഗ്യം സിദ്ധിച്ചു. അതിന്റെ രോഷത്തില്‍ സുഹൃത്തുക്കള്‍ക്ക് അയച്ച “സദ്യ അനുഭവക്കുറിപ്പ്“(അനുഭവിച്ചതിനെ പറ്റിയുള്ള കുറിപ്പ്), ഇവിടെയും പോസ്റ്റുന്നു. ഇതു മെയിലായി കറങ്ങുന്നുണ്ട്. ഫോര്‍വേഡ് അടിച്ചുമാറ്റി ബ്ലോഗില്‍ ഇട്ടവനേ എന്ന് വിളിക്കരുത്. സത്യമായും ഞാന്‍ തന്നെ എഴുതിയതാണ്]
----------------------------------------------------------------------------------

ഇത് എഴുതി തീരും വരെ ഞാന്‍ ഓഫീസില്‍ ഉണ്ടാവുമോ എന്നെനിക്കുറപ്പില്ല. എങ്കിലും തുടങ്ങാം..

ആ‍ദ്യം ഇലക്കുമുന്‍പില്‍ പോയി ഇരുന്നപ്പോള്‍ തന്നെ എന്തൊക്കെയോ മിസ്റ്റേക്കുകള്‍ ഫീല്‍ ചെയ്തിരുന്നു.

ഇലയുടെ വടക്കേ അറ്റത്ത്, റോഡ് സൈഡില്‍ പട്ടിചുരുണ്ട് കിടന്നുറങ്ങും പോലെ കിടന്നിരുന്നത്, ഞങ്ങളുടെ നാട്ടില്‍ അവിയല്‍ എന്ന് വിളിക്കുന്ന, സദ്യകള്‍ക്ക് ഞാന്‍ ഏറ്റവും കൂടുതല്‍ കഴിക്കുന്ന അതേ ഐറ്റം തന്നെ ആണ് എന്ന് തിരിച്ചറിഞ്ഞത്, അതു ടേസ്റ്റ് ചെയ്തിട്ടായിരുന്നില്ല, മറിച്ച് അവിയല്‍ എന്ന് വിളിക്കാന്‍ പറ്റിയ വേറെ ഒരു കറിയും ആ ഇലയില്‍ കാണാത്തതുകൊണ്ടായിരുന്നു.

ആദ്യം പരിപ്പാണെന്ന് പറഞ്ഞ് കൊണ്ടെ തള്ളിയിട്ടുപോയത്, പരിപ്പാണെന്നറിയാന്‍ വലിയ പ്രയാസം ഒന്നും ഉണ്ടായില്ല. കാരണം കടയില്‍ നിന്ന് വാങ്ങുന്ന അതേപരുവത്തിലുള്ള കുറച്ച് പരിപ്പിന്‍ കുഞ്ഞുങ്ങള്‍ അതില്‍ കിടന്ന് ചിരിച്ചുകാണിക്കുന്നുണ്ടായിരുന്നു.

പരിപ്പുകറി തീര്‍ന്ന അതേ നിമിഷത്തില്‍, ഇലയില്‍ ഫ്രീ ആയി കിടന്ന സ്ഥലത്ത്, കുറച്ച് നെയ് കൊണ്ടുവന്ന് ഒഴിച്ചപ്പോളാണ് വിളമ്പുകാരുടെ ‘ആല്‍മാര്‍ത്ത’ ശെരിക്കും ബോദ്ധ്യപ്പെട്ടത്.

സാമ്പാര്‍ വന്ന്പ്പോള്‍, അതു വിളമ്പുന്ന ചേട്ടന്റെ കയ്യിലെ മസിലിലേക്ക് ഒരു നിമിഷം നോക്കിപ്പോയി എന്നൊരു തെറ്റേ ഞാന്‍ ചെയ്തുള്ളൂ.. പിന്നീട് ഇലയിലേക്ക് നോക്കിയ ഞാന്‍ കാണുന്നത്, ഇലയുടെ തെക്കേ അറ്റത്തിരുന്ന പഴം നിലയില്ലാത്ത വെള്ളത്തില്‍ കിടന്ന് കയ്യുംകാലുമിട്ടടിക്കുന്നതാണ്.. ഞാന്‍ അവ്സാനം കഴിക്കാനായി കാത്ത് വച്ചിരുന്നതായിരുന്നു ആ പഴം(അതില്‍ പാചക്കാര്‍ക്ക് പരാക്രമം ഒന്നും ചെയ്യാനില്ലല്ലോ).. പിന്നെ അതില്‍ കിടന്ന 4X4 സൈസിലുള്ള് രണ്ട് വെള്ളരിക്ക കഷണവും ചോറും ഒക്കെ വച്ച് ചിറ കെട്ടി ആ വെള്ളപ്പൊക്കം തടഞ്ഞുനിര്‍ത്തി..
(എതിര്‍വശത്തിരുന്ന സുഹൃത്തുക്കള്‍, ഉരുള്‍പൊട്ടലില്‍ സ്ഥലം ഒലിച്ചുപോയ കര്‍ഷകരെപ്പോലെ, സാമ്പാര്‍ ഒഴുകിപ്പോയ ഇലയിലേക്ക് നോക്കി ഇരിക്കുന്ന കാഴ്ച നയനാനന്ദകരമായിരുന്നു..)

പുളിശേരിയുടെ കാര്യത്തില്‍ നമ്മള്‍ ഇത്തിരി കടന്നു ചിന്തിച്ചു.. ചോറ്കൊണ്ട് തന്നെ നല്ലൊരു ഡാം കെട്ടിയിട്ടാണ് പുളിശേരി ഒഴിപ്പിച്ചത്.. അതുകൊണ്ട് പ്രത്യേകിച്ച് ആളപായമൊന്നും ഉണ്ടായില്ല.

--ഒരു ചെറിയ ഇടവേള.. ഒന്നു ടോയ്‌ലറ്റില്‍ പോയിട്ട് വരാം.. ഒന്നും ഉണ്ടായിട്ടല്ല. ചുമ്മാ --

ഇത്രയും വെള്ളം കുടിച്ച(സാ‍മ്പാറും പരിപ്പും) ആളുകളുടെ വയര്‍ ആകെ കലങ്ങിമറിഞ്ഞ് കിടക്കുന്നത് മനസിലാക്കി ആണ് പായസം ഡിസൈന്‍ ചെയ്തിരുന്നത്. ഒരുമാതിരി സിനിമാപോസ്റ്റര്‍ ഒട്ടിക്കുന്ന പശപോലെ... അതുകൊണ്ട് വന്‍ പ്രശ്നങ്ങള്‍ ഒഴിവാക്കി എന്ന് ഹോട്ടലുകാര്‍ക്ക് സമാധാനിക്കാം..

ഒടുവില്‍ നല്ല രസമുണ്ടെന്ന് ആരോ പറയുന്നത് കേട്ട്, ഇവനാരെടാ ഈ സദ്യകഴിച്ച് രസിച്ചവന്‍ എന്ന് കരുതി നോക്കിയതാ.. ഒരു ചേട്ടന്‍ ഒരു തൊട്ടിയില്‍ നിന്നു ഗ്ലാസ് ഇട്ട് രസം മുക്കിത്തരുന്നു.. ആളുടെ കയ്യിലു ദേഹത്തും എല്ലാം രസം.. ആ രസകരമായ കാഴ്ച കണ്ടതുകൊണ്ട് രസം കഴിക്കാന്‍ തോന്നിയില്ല.

ഒടുവില്‍ ഒരല്പം മോരും കഴിച്ച്, ഇലയുടെ കബറിടത്തില്‍ ഒരു പഴത്തൊലിയും എടുത്തിട്ട് യാത്രയായി.. സഫറോം കി സിന്ദഗി ജോ കഭി ഖതം നഹി ഹും ഹേ ഹൈ.. (എന്നു വച്ചാല്‍, ഒരാഴ്ചത്തേക്ക്, ഇനി വയറ് ശരിയാകുമെന്ന് തോന്നുന്നില്ലെന്ന്)

--ഒരു ചെറിയ ഇടവേള കൂടി --

ശ്ശെ.. പോയത് വെറുതെ ആയി. ടോയ്‌ലറ്റിന്റെ ഭാഗത്തേക്ക് അടുക്കാനേ പറ്റുന്നില്ല.

ഇത്രയും വലിയ ഒരു സദ്യ കഴിച്ചിട്ട് മുഴുവന്‍ കുറ്റമേഉള്ളോ എന്ന് നിങ്ങള്‍ ചോദിച്ചേക്കാം.. സത്യം പറയണമല്ലോ, കരിങ്ങാലി വെള്ളം സൂപ്പര്‍ ആയിരുന്നു... (അതില്‍ എത്ര വെള്ളം ചേര്‍ത്താലും മുറ്റായിരിക്കുമല്ലോ)


ചെറുപ്പത്തില്‍ കേട്ട, പിന്നീട് മറന്ന, ഒരു സരസ ശ്ലോകം ഓര്‍മ്മ വന്നു എന്നതാണ് എന്നെ സംബന്ധിച്ച് ഈ സദ്യകൊണ്ടുണ്ടായ നേട്ടം..

എട്ടാണ്ടെത്തിയ തൈരു,മെന്റെ ശിവനേ ചുണ്ണാമ്പു ചോറും, പുഴു--
ക്കൂട്ടം തത്തിടുമുപ്പിലട്ടതുമഹോ കൈപ്പേറുമുപ്പേരിയും
പൊട്ടച്ചക്കയില്‍ മോരൊഴിച്ചു വഷളായ്‌ തീര്‍ത്തോരു കൂട്ടാനുമീ--
മട്ടില്‍ ഭക്ഷണമുണ്ടു ഛര്‍ദ്ദി വരുമാമെര്‍ണ്ണാകുളം ഹോട്ടലില്‍.
[ശ്ലോകം ആദ്യം എഴുതിയപ്പോള്‍ ചില തെറ്റുകള്‍ ഉണ്ടായിരുന്നു. തിരുത്തിന് ഉമേഷ്ജിയോട് കടപ്പാട്]

വാല്‍ക്കഷണം:

ചോദ്യം: ചേട്ടാ, അല്‍-രാജില്‍ ഓണ സദ്യകഴിക്കാന്‍ പോയതാണോ? സദ്യഎങ്ങനെ? നല്ല ഓളമാണോ?
ഉത്തരം: ഓളമാണോന്നോ ? അതില്‍ ആ സാമ്പാര്‍ ഒഴിക്കുമ്പത്തേ ഓളം കണ്ട് കഴിഞ്ഞാല്‍, നമ്മള് ശംഖുമുഖത്താണെന്ന് തോന്നിപ്പോകും...

62 comments:

ധനേഷ് said...

ഒരു ഓണസദ്യ കഴിച്ചതിന്റെ രോഷത്തില്‍ എഴുതിയത്. സദ്യ കഴിച്ച് ഒരു മണിക്കൂര്‍ കൊണ്ട് എഴുതിയതാണ്, കൂടുതലൊന്നും പ്രതീക്ഷിക്കരുത്...

നിരക്ഷരൻ said...

തല്‍ക്കാലം ഞാന്‍ ഒരു ഓണത്തേങ്ങ അടിച്ച് പോകുന്നു. ബാക്കി വായിച്ചിട്ട് .... :)

((((ഠേ)))))

മീര അനിരുദ്ധൻ said...

ധനേഷേ സത്യമായും ചിരിച്ചു പോയി.ആ ഹോട്ടലിന്റെ പേരു പറഞ്ഞു താ.ഇനി അവിടെ കയറാതെ നോക്കാമല്ലോ

സുനിൽ കൃഷ്ണൻ(Sunil Krishnan) said...

ഹ ഹ കൊള്ളാം കൊള്ളാം...അവസാനത്തെ ആ കവിത കൂടിയായപ്പോൾ അവന്മാരുടെ പള്ളക്കടിച്ചപോലെയായി.

ആ ഹോട്ടലിന്റെ അഡ്രസ് ഒന്നു തന്നേ..ഈ പോസ്റ്റിന്റെ ഒരു പ്രിന്റെടുത്ത് അതിന്റെ മാനേജർക്ക് അയച്ചു കൊടുക്കാം ഞാൻ...!

ഇവിടെയും ഓണ സദ്യ നടത്തുന്ന ഹോട്ടലുകൾ ഉണ്ട്..ഇത്രെം വരില്ലെന്നു തോന്നുന്നു..

എന്തായാലും ചിരിപ്പിച്ചു കളഞ്ഞു ധനേഷ് ! “അടിപൊളീ’

മുഫാദ്‌/\mufad said...

തിരുവനന്തപുരത്തെ ഓണവും ഓണ സദ്യയും നാലു കൊല്ലം കഴിച്ചതിന്റെ അനുഭവത്തില്‍ ആ സാമ്പാറിന്റെ ഓളം എന്റെ മുന്നിലെ ഇലയിലും അലയടിക്കുന്നുണ്ട്.
പിന്നൊരു കാര്യം- കുളത്തൂര്‍ അശ്വതി ഹോട്ടലില്‍ പോയാ മതി ഇനി മുതല്‍...വയറു നിറച്ചു ഭേഷായുണ്ണാമ്‌.

ഓണാശംസകള്‍....

കണ്ണനുണ്ണി said...

വലത്തേ അറ്റത്ത്‌ അന്യ നാട്ടില്‍ വന്നു പെട്ട അഭയാര്‍ത്തികളെ പോലെ ഇരുന്ന ശര്‍ക്കരവരട്ടിയും ഉപ്പേരിയും എങ്ങനെ ഉണ്ടായിരുന്നു ധനേഷേ

പള്ളിക്കുളം.. said...

ഹഹ..
ഉഗ്രൻ!

“ഇലയുടെ കബറിടത്തില്‍ ഒരു പഴത്തൊലിയും എടുത്തിട്ട് യാത്രയായി.“

Areekkodan | അരീക്കോടന്‍ said...

ഹ ഹ ഹ ഹ ...കൊള്ളാം...കൊള്ളാം...

Nivin said...

aliyaa chirichu adappilaki... :-)


Nivin

Typist | എഴുത്തുകാരി said...

I T ഓണസദ്യകളെല്ലാം ഇങ്ങനെയായിരിക്കുമോ? പാവം ധനേഷ്.

അല്ലാ, ഇപ്പഴുമുണ്ടൊ ഓഫീസില്‍?

വിഷ്ണു | Vishnu said...

എന്നാലും ഒരു ഓണമായിട്ട് നീ ആ ഹോട്ടല്‍കാരുടെ കഞ്ഞി കുടി മുട്ടിച്ചു കളഞ്ഞല്ലോ, കഴക്കൂട്ടം അല്‍ സാജ് പൂട്ടിക്കാന്‍ ഈ പോസ്റ്റ്‌ തന്നെ ധാരാളം,
എന്നാലും പുത്തെന്പാലം രാജേഷ്‌, ഓം പ്രകാശ്‌ എന്നി ഗുണ്ടകള്‍ ഇപ്പോഴും തിരുവനന്തപുരത്ത് ഒരു ക്വട്ടേഷന്‍ പണി കൂടെ ഏറ്റെടുക്കാന്‍ തയ്യാര്‍ ആണെന്ന റിപ്പോര്‍ട്ട്‌ .ജാഗ്രത !!

Rare Rose said...

ഹി..ഹി.സദ്യ വിശേഷം കലക്കി..അതിലും കേമായി ആ അടിക്കുറിപ്പ്..:)

ദീപ said...

ഒരു 'നര്‍മ' സദ്യ ഉണ്ട പോലെ ഉണ്ട്..
നീ വിഷമിക്കണ്ട ഓണത്തിന് വീട്ടിപോയി സദ്യ ഉന്നമെന്നെന്കിലും സമാധാനിക്കമല്ലോ...

നിരക്ഷരൻ said...

“സഫറോം കി സിന്ദഗി ജോ കഭി ഖതം നഹി ഹും ഹേ ഹൈ.. (എന്നു വച്ചാല്‍, ഒരാഴ്ചത്തേക്ക്, ഇനി വയറ് ശരിയാകുമെന്ന് തോന്നുന്നില്ലെന്ന്).....“

പരിഭാഷ കലക്കി. പോസ്റ്റും.

മാ ഫലേഷു കഥാജ്ഞെനാ.
‘മാങ്ങയുടെ ചെന ഒരിക്കലും മാറുകയില്ല‘ എന്ന പരിഭാഷയെ ഓര്‍മ്മിപ്പിച്ചു :) :)
-------------------------------
ഇനി സീരിയസ്സായി ഒരു കാര്യം.

കുറച്ച് വര്‍ഷങ്ങള്‍ക്ക് മുന്‍പ് ഒരു ലേഖനം വായിക്കാനിടയായിരുന്നു. ഹോട്ടലില്‍ ഓണസദ്യ കഴിക്കാന്‍ പോയിട്ട് കൈ കഴുകുന്ന സമയത്ത് ഹോട്ടലില്‍ ജോലി ചെയ്യുന്ന ഒരു പയ്യന്റെ ആത്മഗതം കേള്‍ക്കാനിടയായ ആരോ ഒരാള്‍ എഴുതിയ ഉള്ളുനോവിക്കുന്ന ഒരു ലേഖനം.

ഓണമായാലും, അതുപോലുള്ള എന്ത് ഫെസ്റ്റിവല്‍ ആയാലും ഹോട്ടലിന്റെ അടുക്കളപ്പുറത്ത് അദ്ധ്വാനിക്കുന്ന കുറേ മനുഷ്യജന്മങ്ങളുണ്ട്. അവരുടെ കഷ്ടപ്പാട് അതിരാവിലെ തുടങ്ങും, കറിക്കരിയലും, പാത്രം കഴുകലുമൊക്കെയായി രാവേറുന്നതുവരെ ജോലികള്‍ നീളുകയും ചെയ്യും. ഓണവും മറ്റാഘോഷങ്ങളുമൊക്കെ വീടുകളില്‍ നിന്ന് ഹോട്ടലുകളിലേക്ക് കുടിയേറിയപ്പോള്‍ ഓണമൊന്നുമില്ലാതായത് ആ പാവങ്ങള്‍ക്കാണ്. ആ ദിവസങ്ങളില്‍ എത്ര പണിയെടുത്താലും തീരില്ല. മുതലാളിയുടെ ചീത്ത കേള്‍ക്കുന്നതിന് ഒരു പഞ്ഞവുമുണ്ടാകില്ല. നടുവൊടിയുന്നതും ചീത്ത കേള്‍ക്കുന്നതും മാത്രമാകുന്നു അവര്‍ക്ക് ഓണമെന്ന് വെച്ചാല്‍ . ‘പണ്ടാരമെടങ്ങാന്‍ ഈ നശിച്ച ഓണം ഒന്ന് തീര്‍ന്നാല്‍ മതിയായിരുന്നു‘ എന്ന് ഒരു പയ്യന്‍ പറയുന്നത് കേട്ടിട്ടാണ് ആ നല്ല മനുഷ്യന്‍ അന്ന് ആ ലേഖനം എഴുതിയത്. അന്നത് വായിച്ച് ശരിക്കും വിഷമിച്ചുപോയിട്ടുണ്ട്. ഇന്നും അത് മറക്കാനായിട്ടില്ല.

ഇപ്രായത്തിനുള്ളില്‍ , മദ്രാസില്‍ ജീവിക്കുന്ന കാലത്ത് ഒരിക്കല്‍ മാത്രമാണ് ഹോട്ടലില്‍ ഓണം കഴിച്ചിട്ടുള്ളത്. മുന്‍‌പറഞ്ഞ ലേഖനം വായിക്കുന്നതിനും മുന്‍പാണത്.

ആ ലേഖനം വായിച്ചതിന്റെ ആഫ്‌റ്റര്‍ ഇഫക്‍റ്റാണ് വാല്‍ക്കഷണം. ഹോട്ടലുകളില്‍ നിന്ന് ഒരു ഫെസ്റ്റിവലിനും ആഹാരം കഴിക്കില്ലെന്ന് തീരുമാനിച്ചു. അതിപ്പോഴും തുടരുന്നു.

പലയിടത്തും ആ ഭക്ഷണം ഉണ്ടാക്കുന്നവര്‍ കഷ്ടപ്പാടുകള്‍ സഹിക്കാനാവാതെ പ്രാകിക്കൊണ്ടാണ് ഈ ഓണസദ്യയൊക്കെ ഉണ്ടാക്കാനായി സഹകരിക്കുന്നത്. അതൊക്കെ ധനേഷിനുണ്ടായ പോലത്തെ അനുഭവങ്ങളില്‍ വന്ന് കലാശിച്ചാല്‍ അത്ഭുതപ്പെടാനൊന്നുമില്ല.

എന്റെ ഈ ബോറന്‍ കമന്റ് നല്ലൊരോണത്തിന്റെ മൂഡ് നശിപ്പിച്ചിട്ടുണ്ടാകില്ലെന്ന് കരുതുന്നു.

എല്ലാവര്‍ക്കും ഓണാശംസകള്‍ :)

Shaju Joseph said...

ഊണ്‌ മോശമായിരുന്നെങ്കിലും എഴുത്ത്‌ ഗംഭീരമായി..ഓണസദ്യ ഉണ്ട പ്രതീതി!

താരകൻ said...

ഓണത്തിനെല്ലാവായനകാർക്കും ചിരി വിഭവം വിളമ്പിയ സുഹൃത്തെ നന്ദി.

nandakumar said...

:D lathu kalakki. funny one

(special thnx to niraksharan too)

siva // ശിവ said...

കഴിഞ്ഞ വര്‍ഷത്തെ ഓണാഘോഷങ്ങളുടെ ഭാഗമായി സ്റ്റാച്ചുവിലെ പങ്കജ് ഹോട്ടലില്‍ നിന്നും കഴിച്ച ഓണസദ്യയുടെ ക്ഷീണം ഇതുവരെ മാറിയിട്ടില്ല....... ധനേഷിന്റെ സദ്യ അത്ര മോശമൊന്നുമല്ല.....

വശംവദൻ said...

ധനേഷേ സദ്യ കെങ്കേമം ! അവിയലാണ് ഏറ്റവും ഇഷ്ടപ്പെട്ടത്.

:)

ഓണാശംസകൾ

ramanika said...

ഇത്രയും വലിയ ഒരു സദ്യ കഴിച്ചിട്ട് മുഴുവന്‍ കുറ്റമേഉള്ളോ എന്ന് നിങ്ങള്‍ ചോദിച്ചേക്കാം.. സത്യം പറയണമല്ലോ, കരിങ്ങാലി വെള്ളം സൂപ്പര്‍ ആയിരുന്നു

വേദന അറിയുന്നു
തിരുവോണത്തിന് ഈ സദ്യ മറക്കാന്‍ തക്ക വിധത്തില്‍ ഒരു ഉഗ്രന്‍ സദ്യ കിട്ടും

ഹാപ്പി ഓണം വിത്ത്‌
tasty very tasty സദ്യ!

അനില്‍@ബ്ലോഗ് // anil said...

ഹ ഹ !!
കൊള്ളാം സദ്യ.

ഇത്തവണയും കയറിയ ആവേശം വെറുതെ ആയില്ല, പോസ്റ്റ് നന്നായി.

കൂട്ടുകാരൻ said...

ധനേഷേ,
ഓഫീസില്‍ വെച്ച് മെയില്‍ വായിച്ചപ്പോളെ ഒരു ബ്ലോഗിന്റെ മണം അടിച്ചായിരുന്നു. താമസിയാതെ തന്നെ അത് പോസ്റ്റ്‌ ചെയ്തത് നന്നായി. അവസാനത്തെ കവിത പിന്നെ ചേര്‍ത്തത് ആണല്ലേ. ഒരുമിച്ചു ഓഫീസില്‍ ഉണ്ടായിരുന്നിട്ടും പരിചയപ്പെടാന്‍ ഈ ബ്ലോഗ്‌ വേണ്ടി വന്നു. എന്തായാലും കലക്കി. ഓണാശംസകള്‍.

Kamchalabdhan said...

ഡാ ഇത്രക്കും നീ അനുഭവിച്ചിട്ടും എന്നെ മറന്നൂ അല്ലെ നിനക്ക് രണ്ടു uncultured barbarian ഉം barberisavum അടിച്ചിട്ട് പോന്നാല്‍ പൊരയിരുനോ?? ഇത് ചുമ്മാ RIT യെ പറയിപ്പിക്കാന്‍ ഇതിനൊക്കെ അല്ലെ ഞാന്‍ അന്ന് നിങ്ങള്ക്ക് ട്രെയിനിംഗ് തന്നത് !!!!!!!

വാഴക്കോടന്‍ ‍// vazhakodan said...

ഹാപ്പി ഓണം !
എഴുത്ത്‌ ഗംഭീരമായി!

ഓണാശംസകള്‍....

Anonymous said...

അളിയാ... ഇതു കൊറെ കറങ്ങിക്കൊണ്ടിരിക്കുവാ.. ദിവന്‍ നമ്മ്ടെ സ്വന്തം ഗഡിയാണെന്ന് ഒരു നൂറ്റമ്പത് പേരൊടെങ്കിലും പറഞ്ഞു...!

yousufpa said...

ചുരിക്കി പറഞ്ഞാല്‍ ഓണ സദ്യ ശെരിക്കും അനുഭവിച്ചൂ ഇല്ലെ..?തന്തോയം......


ഓണാശംസകള്‍

ജോബിന്‍ said...

ഈ ടിന്റുമോന്റെ ഒരു കാര്യം..
ഊണ് കഴിഞ്ഞു 30 മിനിറ്റിനകം തകര്‍ത്തു വാരിയ ഒരു പോസ്റ്റ്‌ ...

"ഇത് ഫോര്‍വേഡ് ചെയ്യരുത് "എന്ന് പറഞ്ഞു അയച്ചപ്പോള്‍ തന്നെ ടിന്റുമോന്‍ ബെര്‍ളീടെ ശിഷ്യന്‍ ആനലോ എന്നോര്‍ത്ത്തെ ഉള്ളൂ...
ഗുരുവേ നമഹ...

Unnikrishnan.B said...

dhanesh kalakki :)
Super aayittundu... officil ithu van famous aayi...

പാവത്താൻ said...

കൊള്ളാമല്ലോ ഓണസദ്യ.ആണ്ടിലൊരിക്കല്‍; ഓണത്തിനും ക്രിസ്തുമസ്സിനും മാത്രം ഓരോ പോസ്റ്റിട്ടാല്‍ പോര.ഇനി വല്ലപ്പോഴുമൊക്കെ സമയം കിട്ടുമ്പോഴൊക്കെ ആ ഹോട്ടലില്‍ പോയി ഭക്ക്ഷണം കഴിക്കണം. എന്നിട്ട് പെട്ടെന്ന് തന്നെ ഓരോ പോസ്റ്റുമിടണം....(ഓരൊരുത്തര്‍ക്ക് പ്രചോദനമുണ്ടാകുന്നത് ഓരോ കാര്യങ്ങളില്‍ നിന്നാണല്ലോ....) ഓണാശംസകള്‍..

അരുണ്‍ കരിമുട്ടം said...

ധനേഷേ,
മെയില്‍ കിട്ടിയാരുന്നു.പക്ഷേ അതിനു മുമ്പേ ഈ പോസ്റ്റ് വായിച്ചിരുന്നതിനാല്‍ അന്നേരം ചിരിക്കാന്‍ പോയില്ല:)
നന്നായിരിക്കുന്നു
വളരെ രസകരം
ഓണാശംസകള്‍

കുക്കു.. said...

കൊള്ളാം...ഹാപ്പി ഓണം....
:)

Appu Adyakshari said...

ധനേഷേ, ചിരിച്ചുകൊണ്ടു വായിക്കുമ്പോഴും ആ ഹോട്ടലിന്റെ ഉൾവശവും ടോയ്ലറ്റും ഓർത്തുപോയി .. ഒപ്പം ധനേഷിന്റെ മുഖവും !!

ചന്ദ്രകാന്തം said...

ഓണസദ്യയുടെ അനുഭവം ശരിയ്ക്കും ഓളം‌വെട്ടുന്നതു തന്നെ.
എഴുത്ത്‌ രസകരമായിരിയ്ക്കുന്നു.

പ്രദീപ്‌ said...

ധനേഷ് , ഞാന്‍ ഒരു കമന്റും എഴുതുന്നില്ല , കാരണം എനിക്കത് ശരിക്ക് വായിക്കാന്‍ കഴിഞ്ഞില്ല . കട്ടിലില്‍ എന്റെ കയില്‍ ഇരുന്ന ലാപ്ടോപ് , കൂടെ കിടന്നു വായിച്ച അജയുടെ ചിരി കാരണം , കിടന്നു കുലുങ്ങുവാരുന്നു . അലക്ക് തുടരൂ !!!!!!!!

Irshad said...

“വലിയ വലിയ കഷ്ടപ്പാടുകളില്‍ കൂടി കടന്നു വന്നവര്‍ക്കേ നന്നായി ചിരിപ്പിക്കാന്‍ കഴിയൂ“ എന്നു കേട്ടിട്ടുണ്ട്. പക്ഷെ കഷ്ടപ്പാടുകള്‍ ഇതൊക്കെയാണെന്നു ഇപ്പോഴാ മനസ്സിലായതു.

നന്നായിട്ട് അലക്കി മോനേ....

ഇനി നീ ഇക്കൊല്ലം പോസ്റ്റണ്ട....

ശ്രീ said...

അപ്പോ അടുത്ത കൊല്ലത്തെ ഓണം വരെ ഓര്‍ത്തു വയ്ക്കാന്‍ നല്ലൊരു 'ഓണ സ്മരണ' തന്നെ കിട്ടി ,അല്ലേ?

ഓണാശംസകള്‍...

naveenjjohn said...

kollam mutthe.... muttichu...

നാട്ടുകാരന്‍ said...

വെറുതയല്ല ധനേഷ് എല്ലാ മീറ്റിനും വരുന്നത് !

Anil cheleri kumaran said...

oh.! great comedy.. keep it up...

ആവോലിക്കാരന്‍ said...

അല്‍ സാജ് കാര്‍ ധനെഷിനിട്ടു ക്വട്ടേഷന്‍ കൊടുത്തിട്ടുണ്ടെന്ന് ആണ് കേള്കുന്നത്. ഒന്ന് കരുതിയിരിക്കുന്നത് നല്ലതായിരിക്കും.ഹാപ്പി ഓണം :)

Umesh::ഉമേഷ് said...

അടിപൊളി സദ്യ!

ഓ. ടോ.:ശ്ലോകത്തില്‍ ചെറിയ തെറ്റുണ്ടു്‌. ശരിയായ ശ്ലോകം ഇവിടെ.

ചെലക്കാണ്ട് പോടാ said...

എന്തിനാ ധനേഷേ, ചുമ്മാ ഇടയ്ക്കിടയ്ക്കൊരു ബ്രേക്ക്....

സദ്യ നന്നായി തയ്യാറാക്കുന്ന എത്രപേരുണ്ട് അനന്തപുരിയില്‍ എന്നിട്ടും നിങ്ങള്‍ ഇവിടം തന്നെ കണ്ടു പിടിച്ചല്ലോ....

ഇതാ പറേണേ വരാനുള്ളത് വഴിയില്‍ തങ്ങില്ല...

ഓണാശംസകള്‍....അടുത്ത ഓണവും വ്യത്യസ്തമാകാതിരിക്കട്ടെ എന്ന് പ്രാര്‍ത്ഥിക്കാം :)

Manikandan said...

ഇന്നുച്ചക്ക് ഇതേ അനുഭവം ഉണ്ടായതു കൊണ്ട് ധനേഷിന്റെ അവസ്ഥ ശരിക്കും മനസ്സിലായി. കളമശ്‌ശേരിയിലെ പതിവു സ്ഥലത്ത് (സീഗേറ്റ്)തന്നെയായിരുന്നു ഇത്തവണയും ഞങ്ങളുടെ ഓണസദ്യ. എല്ലാവർഷവും ബോറായി വരുന്നതൊഴിച്ചാൽ ഒരു മെച്ചവും ഇല്ല. ഇതിൽ എഴുതിയതിന്റെ തനിയാവർത്തനം തന്നെയായിരുന്നു എന്റെ അനുഭവവും. അതുകൊണ്ട് തന്നെ എഴുതിയതിൽ അല്പവും അതിശയോക്തിയില്ലെന്ന് ഉറപ്പിച്ചു പറയാം.

ധനേഷ് said...

ഇതു വായിച്ച എല്ലാവര്‍ക്കും നന്ദി.
മറുപടി ഇടാന്‍ അല്പം വൈകി..

ഇത്രയേറെ ആളുകള്‍ക്ക് ഇഷ്ടപ്പെടുമെന്നൊന്നും പ്രതീക്ഷിക്കതെയാണ് ഇത് പോസ്റ്റ് ചെയ്തത്..
എനിക്കു നല്‍കുന്ന ഈ പ്രോത്സാഹനത്തിന്, നന്ദി.. (തത്ക്കാലം നന്ദി മാത്രേ ഉള്ളൂ,... :-)

മീര: താങ്ക്സ്

സുനിലേട്ടാ: നന്ദി.. ഓണത്തിന് നാട്ടിലില്ലേ?

മുഹാദ്: ഇതൊക്കെ മുന്‍പേ അനുഭവിച്ചതാണല്ലേ? കുളത്തൂര്‍ പോകാറുണ്ട്.. ;-)

കണ്ണനുണ്ണി: ഹഹ ആ പ്രയോഗം ഇഷ്ടപ്പെട്ടു.. ഉപ്പേരി നല്ലതായിരുന്നു.. (അല്ലെങ്കിലും നമ്മള്‍ നല്ലതൊന്നും കാണില്ലല്ലോ)



പള്ളിക്കളം: നന്ദി

അരീക്കോടന്‍: താങ്ക്സ്

നിവിനേ: :-)

എഴുത്തുകാരിചേച്ചീ: വല്യ കുഴപ്പമില്ല



വിഷ്ണു: പേടിപ്പിക്കാ‍തെടേയ്.

Rare Rose: താങ്ക്സ്

ദീപ: അതെ ഓണത്തിന് ഗംഭീരമായി ഉണ്ടു..

ധനേഷ് said...

നീരുഭായ്: തേങ്ങയ്ക്കും, നീണ്ട കമന്റ് എഴുതാന്‍ കാണിച്ച ആത്മാര്‍ത്ഥതക്ക് നന്ദി.

താങ്കള്‍ പറഞ്ഞത് സത്യമാണ്.. തൊഴിലാളികളുടെ ഇത്തരം കഷ്ടപ്പാടുകള്‍, മോശം ഭക്ഷ്ണത്തിന്റെ കാരണമാകാനുള്ള സാധ്യത വളരെ ഏറെയാണ്.. താങ്കളുടെ കമന്റ് ഒരിക്കലും ഓണത്തിന്റെ സന്തോഷം നശിപ്പിക്കുന്നതല്ല.. (സത്യന്റെ മുഖം വികൃതമാണെന്ന് പണ്ടൊരു നസീര്‍ ഫാന്‍ പറഞ്ഞിട്ടുണ്ടല്ലോ)

അത്തരം വിഷയങ്ങള്‍ കൈകാര്യം ചെയ്യനുള്ള ത്രാണി ഇല്ലത്ത്തുകൊണ്ട് ഞാന്‍ ഇങ്ങനെയൊക്കെ എഴുതുന്നു... :-)
പക്ഷേ ഈ വിഷയം താങ്കള്‍ക്ക് ഒരു പോസ്റ്റാക്കാമായിരുന്നു എന്നൊരു അഭിപ്രായം കൂടി എനിക്കുണ്ട്.. :-)

നന്ദി..

ധനേഷ് said...

ഷാജു: ഇഷ്ടപ്പെട്ടു എന്നറിഞ്ഞതില്‍ സന്തോഷം

താരകന്‍ : നന്ദി



നന്ദേട്ടാ: താങ്ക്സ്

ശിവാ: :-) ഇതൊക്കെ കേള്‍ക്കുമ്പോളാ ഒരു സമാധാനം. (സമാ‍ന അനുഭവങ്ങള്‍ പലര്‍ക്കും ഉണ്ടായിട്ടുണ്ടെന്ന്) :-)

വശംവദന്‍: സന്തോഷം

രമണികചേട്ടാ: തിരുവോനത്തിന് വീട്ടില്‍ ഉഗ്രന്‍ സദ്യ തന്നെ കിട്ടി. ആശംസകള്‍ക്ക് നന്ദി..

അനിലേട്ടാ: താങ്ക്സ്

കൂട്ടുകാരാ: ഇപ്പോഴെങ്കിലും നമ്മള്‍ കൂട്ടുകാരയല്ലോ.. :-)

Kamchalabdhan: സോറി അളിയാ മറന്നു പോയി,..

വാഴേ: നന്ദി

വിനൂ: നീ ഫേമസായി തുടങ്ങീട്ടുണ്ട്..

യൂസുഫ്പ: :-)

ജോബിന്‍; :-))

ഉണ്ണി: ഡാങ്ക്സ്

ധനേഷ് said...

പാവത്താന്‍സ്: അവിടുത്തെ ഭക്ഷണം കഴിക്കുമ്പോള്‍ കിട്ടുന്ന പ്രചോദനം പോസ്റ്റിടാനുള്ളതല്ല. :-)

അരുണ്‍: നന്ദി, എല്ലാത്തിനും :-)

കുക്കു: ഹാപ്പി ഓണം.

അപ്പുവേട്ടാ: :-)

ചന്ദ്രകാന്തം: താങ്ക്സ്

പ്രദീപേ: അജയെകൂടി എന്റെ ബ്ലോഗ് പരിചയപ്പെടുത്തിയതിന് നന്ദി..

പഥികന്‍ ഗുരുവേ: അങ്ങു പറഞ്ഞാല്‍ പിന്നെ പോസ്റ്റില്ല.. :)

ശ്രീ: ഓണാശസകള്‍

naveenjjohn ; താങ്ക്യു

നാട്ടൂസ്: :-)

കുമാരന്‍: നന്ദി മാഷേ

ആവോലിക്കാരാ: ഇതുവരെ അവരിങ്ങെത്തീല്ല. ഞാന്‍ നോക്കിയിരിക്ക്വാ..

ധനേഷ് said...

ഉമേഷ്ജി:
ശ്ലോകത്തില്‍ തെറ്റുണ്ടാവുമോ എന്ന് സംശയമുണ്ടായിരുന്നു. ഇത് ചെറുപ്പത്തില്‍ കേട്ട് പഠിച്ചതാണ്. ശരിയായ ശ്ലോകം ഇ-സദസ്സില്‍ കാണുമെന്ന് കരുതി ഒന്ന് ഗൂഗിള്‍ ചെയ്തിരുന്നു. പക്ഷേ “എട്ടാണ്ടായൊരു” എന്ന വാക്കാണ് സെര്‍ച്ചാന്‍ കൊടുത്തത്.. (അവിടെ തന്നെ തെറ്റി)

തെറ്റ് ചൂണ്ടിക്കാണിച്ചതിന് നന്ദി...

എല്ലാവര്‍ക്കും അല്പം വൈകിയ ഓണാശംസകള്‍..
ഒരിക്കല്‍ക്കൂടി നന്ദി..

ഇന്‍ഡ്യാഹെറിറ്റേജ്‌:Indiaheritage said...

ആദ്യം തന്നെ വായിച്ചിരുനു.
ആ അവിയലിന്റെ വിശേഷണം വായിച്ചു തന്നെ ചിരിച്ചു മതിയാകാഞ്ഞിട്ട്‌ ഭൈമിയെയും വിളിച്ചു വരുത്തി വായിച്ചുകേള്‍പ്പിച്ചു ചിരിച്ചു കഴിഞ്ഞെ തുടര്‍ന്നുള്ളു.

കമന്റിടാന്‍ മുഹൂര്‍ത്തം ഇപ്പൊഴേ കിട്ടിയുള്ളു.
ധനേഷേ ഇതുപോലത്തെ പോസ്റ്റുകള്‍ ഇടയ്ക്കിടയ്ക്കിടണേ

krish | കൃഷ് said...

ഇതിന് ഒരു ഹാഫ് സെഞ്ചുറി അടിച്ചില്ലെങ്കില്‍ പിന്നെങ്ങനാ.
സദ്യാനുഭവ വിവരണം കലക്കി. ഇനിയും ഇതുപോലുള്ള ഹോട്ടലോണം ഉണ്ടാവട്ടെ..... എന്ന് ആശംസിക്കുന്നില്ല.

Unknown said...

ഇലയുടെ വടക്കേ അറ്റത്ത്, റോഡ് സൈഡില്‍ പട്ടിചുരുണ്ട് കിടന്നുറങ്ങും പോലെ കിടന്നിരുന്നത് അവിയല്‍ എന്ന് വിളിക്കുന്ന അതേ ഐറ്റം...

ഹ...ഹ...കൊള്ളാം...ഉഗ്രൻ!

കുട്ടിച്ചാത്തന്‍ said...

ചാത്തനേറ്: ഇങ്ങനെ ചെയ്യരുത് മോശമല്ലേ? പകരം.. ഓണസദ്യയുണ്ടോ എന്തൊക്കെയുണ്ട് വിഭവങ്ങള്‍? എന്ന് തരം തിരിച്ച് ഓരോന്നായി ചോദിച്ചറിഞ്ഞ ശേഷം ബിരിയാണിക്ക് ഓര്‍ഡര്‍ ചെയ്യൂ.

Muralee Mukundan , ബിലാത്തിപട്ടണം said...

കന്നിമാസത്തെ ഓണത്തിനാണ് ഈ സദ്യ കഴിക്കുവാൻ ആയത്..വയറിളകി തോറ്റു..ചിരിച്ചിട്ടാണു ..കേട്ടൊ

നിങ്ങളുടെ സ്വന്തം ടുട്ടുസ് :) said...

വളരെ നന്നായിരിക്കുന്നു!

Unknown said...

chirichu marichu dhaneshe....:)

പ്രവീണ്‍ said...

super..kto..
adipoli..chirichu mannu kappi

ചേച്ചിപ്പെണ്ണ്‍ said...

സത്യമായും മനപ്രയാസം തോന്നുന്നു , ഈ ബ്ലോഗ്‌ കാണാന്‍ വയ്കി പോയതില്‍ ...
നന്നായിട്ടുണ്ട് , ഒരുപാട്‌ ചിരിച്ചു .....

anju minesh said...

paavam.....technoparkil undayirunna samayath oru harthal divasam pattini aayath orma vannu

ദീപുപ്രദീപ്‌ said...

തിന്ന പാപവും , വിഷമവും പോസ്റ്റിയപ്പോ പോയിക്കാണും അല്ലെ ? കിടു പോസ്റ്റ്‌. ഇങ്ങനെ ഒരു എഴുത്ത് എഴുതിയില്ലെങ്കില്‍ അടുത്ത ഓണം വരെ ആ സദ്യ വയറ്റില്‍ തന്നെ കിടന്നേനെ

ആമി said...

ഓണസദ്യ ഗംഭീരം..................

കടത്തനാടൻ said...

താങ്കളുടെ ബ്ലോഗ്‌ ഞാൻ വായിച്ചു തുടങ്ങിയതേയുള്ളൂ . ഇതാണ് ബ്രോ എന്റെ ഇതുവരെയുള്ള ഏറ്റവും ഫേവരൈറ്റ്. ഒരടിപൊളി സദ്യ.
ഇപ്പോൾ എഴുതാറില്ലേ?

Chaps said...

മറുനാടൻ മലയാളികള്ക്ക് ഇതു പോലെ ഉള്ള ബ്ലോഗുകൾ വലിയോരാശ്വാസമായിരിക്കും . "സാമ്പാര്‍ വന്ന്പ്പോള്‍, അതു വിളമ്പുന്ന ചേട്ടന്റെ കയ്യിലെ മസിലിലേക്ക് ഒരു നിമിഷം നോക്കിപ്പോയി എന്നൊരു തെറ്റേ ഞാന്‍ ചെയ്തുള്ളൂ.. പിന്നീട് ഇലയിലേക്ക് നോക്കിയ ഞാന്‍ കാണുന്നത്, ഇലയുടെ തെക്കേ അറ്റത്തിരുന്ന പഴം നിലയില്ലാത്ത വെള്ളത്തില്‍ കിടന്ന് കയ്യുംകാലുമിട്ടടിക്കുന്നതാണ്.." ഈ വരികൾ എന്റെ ഓർമയിൽ വരുമ്പോഴെല്ലാം ഞാൻ അറിയാതെ ചിരിച്ചു പോകാറുണ്ട് . എഴുത്ത് നിർത്തരുത് ..... Waiting for your next blog .